Еңбек және халықты әлеуметтік қорғау министрлігі комада жатқан азаматтарға қатысты мүгедектік рәсімдеу тәртібін жеңілдетуді көздейтін жаңа бұйрық жобасын әзірледі, деп хабарлайды Arnapress.kz ведомствоға сілтеме жасап.
Ведомство өмірлік қиын жағдайға тап болған азаматтардың отбасыларына әлеуметтік қолдау көрсету тетіктерін қайта қарап, медициналық-әлеуметтік сараптама жүргізу және мемлекеттік төлемдерді тағайындау қағидаларына өзгерістер енгізуді ұсынып отыр.
Жаңа түзетулерге сәйкес, енді комада жатқан азаматтардың атынан медициналық-әлеуметтік сараптамаға өтініш беру құқығы олардың жақын туыстарына немесе жұбайына заң жүзінде рәсімделмек. Бұл бұрынғыдай күрделі әрі ұзақ процесті айтарлықтай жеңілдетеді.
Министрліктің мәліметінше, енгізілетін өзгерістердің басты мақсаты – әкімшілік кедергілерді азайтып, азаматтардың мемлекет кепілдік берген әлеуметтік қолдау шараларына кедергісіз қол жеткізуін қамтамасыз ету.
Сонымен қатар жаңа тәртіп комада жатқан азаматтарға мүгедектік мәртебесін уақытылы белгілеуге және тиісті мемлекеттік жәрдемақыларды жедел тағайындауға мүмкіндік береді.
Ұсынылған нормалар төлемдерді рәсімдеу үдерісін ашық әрі қолжетімді етіп, әлеуметтік көмектің тиімділігін арттыруға бағытталған.
Фото: ЖИ
