Қазақстанда зейнетақы жүйесі жаңғыртылып, жұмыс берушінің міндетті зейнетақы жарналары (ЖМЗЖ) арқылы азаматтардың болашақтағы әлеуметтік қорғалуы күшейтілуде, деп хабарлайды Arnapress.kz Қазақстан Республикасы Еңбек және халықты әлеуметтік қорғау министрлігіне сілтеме жасап.
Бұл тетік қызметкердің қазіргі жалақысынан ұстамай, жарнаны толықтай жұмыс беруші есебінен аударуды көздейді.
Жаңа жүйенің басты мақсаты – әрбір жұмыскердің, әсіресе жас буынның тұрақты әрі сенімді зейнетақы қорын қалыптастыру. Осылайша азаматтардың болашақ зейнетақысы үш көзден құралады: мемлекеттік базалық төлем, Бірыңғай жинақтаушы зейнетақы қоры (БЖЗҚ) шотындағы жеке жинақтар және жұмыс беруші есебінен түсетін қосымша шартты-жинақтаушы бөлік.
Мұндай жүйе зейнеткерлерге өмір бойы қосымша төлем алу мүмкіндігін береді. Әсіресе 1975 жылғы 1 қаңтардан кейін туған азаматтар үшін бұл маңызды, себебі олардың зейнетақы капиталы жарналардың тұрақтылығына тікелей байланысты.
2026 жылы жұмыс берушінің міндетті жарна мөлшері қызметкер табысының 3,5 пайызын құрайды. Ал жүйе кезең-кезеңімен енгізіліп, 2028 жылға қарай 5 пайызға дейін жеткізу жоспарланған.
2026 жылғы 1 сәуірдегі дерекке сәйкес, жұмыс берушілер 5,8 млн қызметкерді қосымша зейнетақы құқығымен қамтып отыр. Жыл басынан бері азаматтардың шоттарына 951 млрд теңге аударылған.
Сонымен қатар мемлекет бизнеске де қолдау көрсетіп отыр. Салық кодексіне сәйкес, ЖМЗЖ бойынша жұмсалған шығындар корпоративтік табыс салығын есептеу кезінде шегеріледі. Бұл жұмыс берушілерді әлеуметтік жауапкершілікті арттыруға ынталандырады.
Фото: ЖИ
